بھارت :اترا کھنڈ میں 5 مزارات منہدم کر دیے گئے،راجستھان میں واقع 100برس پرانا مزار نشانے پر
دیرادوں: بھارتی ریاست اترا کھنڈ کے ضلع ادھم سنگھ نگرمیں انتظامیہ نے پانچ مزارات کو مسمار کر دیا ہے ۔علاقے کی مسلم برادری نے اس اقدام پر کڑی تنقید کرتے ہوئے کہا ہے کہ مسلمانوں کو دانستہ طور پرنشانہ بنایا جارہا ہے۔
میڈیا رپورٹس کے مطابق سب ڈویژنل مجسٹریٹ ابھئے پرتاب سنگھ کی نگرانی میں مزارات کی یہ مسماری ضلع کے علاقے کاشی پور میں کندیشوری کے مقام پر کی گئی ہے۔ عینی شاہدین نے کہا ہے کہ مزارات کے انہدام کی کارروائی صبح فجر کے وقت شروع کی گئی۔ اس موقع پر پولیس کی بھاری نفری موجود تھی۔مسلمانوں کو کسی بھی چیز کو ہٹانے یا بچانے کا موقع نہیں دیا گیا ۔ مزارات کو بلڈوزروں کے ذریعے گرانے کی ویڈیوسوشل میڈیا پر وائرہوگئی ہے۔
مقامی مسلمانوں نے جو کئی نسلوں سے مزارات کی دیکھ بال کر رہے تھے ،حکومت کی کارروائی پر انتہائی افسوس کا اظہار کیاہے ۔ محمد رضوان نامی ایک مسلم کا کہنا ہے کہ یہ مزارات کئی دہائیوں سے یہاں موجود تھے، میرے والد اور دادا ان کی صفائی اور دیکھ بال کیا کرتے تھے،یہ ہماری شناخت کا حصہ تھے ،انہیں گرا کر ہمیں مسلمان ہونے کی سزا دی گئی ہے۔
دریں اثنا ریاست راجستھان کے شہر جئے پور کے مہا رانی کالج کے کیمپس میں واقع ایک 100 برس پرانے مزار کو بھی انتہا پسند ہندو گرانے کا مطالبہ کر رہے ہیں۔ علاقے کے مسلمانوں نے اراضی کی دستاویزات بھی پیش کی ہیں لیکن اسکے باوجود دائیں بازو کی ہندو تنظیمیں اسے منہدم کرنے کا مطالبہ کر رہی ہیں۔
یاد رہے کہ مودی کے اقتدارمیں آنے کے بعد سے اتر پردیش ، گجرات ، اترا کھنڈ ، مدھیہ پردیش اور دیگر ریاستوں میں ناجائز قبضہ یا غیر قانونی تعمیر کے نام پر بیسیوں مساجد ، مدارس اور مزاروں کو منہدم کر دیا گیا ہے ۔
یہ اہم ویڈیو بھی دیکھیں
